მთელი ჩემი ოჯახი ხაჭოს ნამცხვრების მოყვარულია. ერთი კვირის წინ კიდევ ახალი რეცეპტი მასწავლა ჩემმა თანამშრომელმა, რომელიც ნამდვილი აღმოჩენა იყო ჩემთვის.
ტკბილი ხაჭოს ხვეულა არაჟნის სოუსით, კიდევ ერთი მიზეზია იმისა, რომ შეიყვაროთ ხაჭო. ისეთი გემრიელია, რომ ვინც პირველად დააგემოვნებს, აღნიშნავს, რომ ჯერ ასეთი გემრიელი დესერტი არ გაუსინჯავს.
მომზადება ძალიან მარტივია, არაჩვეულებრივია დილის საუზმეზე ჩაისთან ან ყავასთან.
ინგრედიენტი ცომისთვის
350 გ ფქვილი
3 გ მშრალი საფუარი
100 გრ რძე
50 გ შაქარი
50 გრ მარგარინი (ან კარაქი)
70 გრ არაჟანი
მარილი
ინგრედიენტები გულსართისთვის
0.5 კგ ხაჭო
100 გ შაქარი
1 კვერცხი
სოუსის ინგრედიენტები
200 გრ არაჟანი
1 ს/კ. შაქარი
მომზადება
აადუღეთ რძე და ჩაასხით ჭიქაში, ჩაყარეთ მასში საფუარი და ნახევარი ჩაის კოვზი შაქარი, აურიეთ და დაამატეთ 3 ჩაის კოვზი ფქვილი. დადგით თბილ ადგილას ნახევარი საათით, რომ აფუვდეს.
ცომისთვის განკუთვნილ ჭურჭელში გაცერით ფქვილი, დაამატეთ მარილი და შაქარი, ჩააჭერით ოთახის ტემპერატურის მარგარინი, არაჟანი და აურიეთ. შემდეგ ჩაასხით საფუვრიანი ნარევი და მოზილეთ ცომი.
დააფარეთ ცომს და დატოვეთ 15 წუთით. შემდეგ ჩაზილეთ და ისევ დაასვენეთ.
ცომი უნდა გააორმაგდეს, თუ დრო გაქვთ, ამოფუების შემდეგ ისევ ჩაზილეთ ცომი, თუ გეჩქარებათ, შეგიძლიათ გაფუების შემდეგ მაშინვე შეუდგეთ გამოცხობას.
გულსართის მოსამზადებლად ხაჭოში ავურიოთ შაქარი და კვერცხი. თუ თხელი გამოვა, დაამატეთ ცოტაოდენი ფქვილი ან დაფხვნილი ორცხობილა.
დააფარეთ ცელოფანი და დადგით ოთახის ტემპერატურაზე.
გაათხელეთ ცომი 1 სმ-ის სისქეზე, გაშალეთ გულსართი და დაახვიეთ რულეტივით. დაჭერით სასურველი სიგანის ნაჭრებად. დაახლოებით გამოდის 20 ცალი.
გამოსაცხობ ფორმაზე გაშალეთ პერგამენტის ქაღალდი, დაალაგეთ ზედ ნამცხვრები, გადააკარით ცელოფანი და დატოვეთ 40 წუთი, რომ ცოტა გაფუვდეს.
სანამ ღუმელში გამოსაცხობად შედგავთ, წაუსვით ზემოდან ათქვეფილი კვერცხი.
გაახურეთ ღუმელი 200 გრადუსზე, შემდეგ 180-მდე დაუწიეთ და გამოაცხეთ ხაჭოს ხვეულა მანამ, სანამ ვარდისფერს არ მიიღებს.
არაჟანი და შაქარი აურიეთ და გამოცხობისთანავე წაუსვით ნამცხვარს ზემოდან, დატოვეთ თბილ ადგილას გაციებამდე.
ხაჭოს ხვეულა ნამცხვარი მზადაა. გემრიელად მიირთვით!
