ძველი ექიმები თვლიდნენ, რომ თაფლის დიეტა დღეგრძელობის გარანტიაა. ეს მაღალკალორიული და ბიოლოგიურად აქტიური პროდუქტი 300-მდე ქიმიურ ნივთიერებას შეიცავს. მისი ძირითადი შემადგენელი ნაწილია გლუკოზა და ფრუქტოზა, რომლებსაც ადვილად ითვისებს ორგანიზმი, ნახშირწყლები ხელს უწყობენ თავის ტვინისა და გულის კუნთის სისხლძარღვების გაფართოებას.
თაფლი მდიდარია ე.წ. ფერმენტული ნივთიერებებით, ვაშლის, ლიმონისა და მჟაუნას მჟავებით, რომლებიც აქტიურად მონაწილეობენ ნივთიერებათა ცვლის პროცესში და აუმჯობესებენ საჭმლის მონელებას, კუჭის წვენის გამოყოფას.
თაფლის მრავალი სამკურნალო თვისება მაგნიუმის მარილების, რკინის, ფოსფორის, კალციუმისა და ვიტამინების „B”, „C”, „Pp” – ს იშვიათი კომპლექსით აიხსნება.
B1, B2, Bb, H და K3 ვიტამინების დიდი რაოდენობით შემცველობა თაფლს სკლეროზის სამკურნალო შესანიშნავ საშუალებად აქცევს.
იმ ადამიანებს, რომლებიც უძილობით იტანჯებიან, ექიმი ხშირად ურჩევს ძილის წინ მიიღონ ¼ ჭიქა ოთახის ტემპერატურის წყალში გახსნილი 1 ჩაის კოვზი თაფლი.
თუ ერთ ჩაის კოვზ თაფლს ერთ ჭიქა ოთახის ტემპერატურის ნადგომ წყალში გახსნით და უზმოზე რეგულარულად დალევთ, მეტად მნიშვნელოვან სამკურნალო-პროფილაქტიკურ კურსს ჩაუტარებთ ორგანიზმს. თაფლიანი წყლის დალევა არა ყლუპ-ყლუპად, არამედ ერთბაშადაა რეკომენდებული. ეს მეტად მნიშვნელოვანია, რადგან ასეთი დალევის დროს კუჭის სფინქტერი ერთბაშად გაიხსნება, სითხე ნაწლავებში გადავა და სწრაფად შეიწოვება სისხლში.
ზოგიერთ სპეციალისტს მიაჩნია, რომ თაფლის წყალხსნარი (ფაქტობრივად, 30%-იანი) შემადგენლობით სისხლის პლაზმის იდენტურია. თაფლი წყლის სტრუქტურირებას ახდენს, რაც მის სამკურნალო თვისებებს კიდევ უფრო ზრდის. თაფლიანი წყალი ორგანიზმის მიერ სწრაფად და სრულად შეითვისება.
მაინც რა ეფექტი აქვს ასეთი ხსნარის მიღებას?
აბალანსებს საჭმლის მონელების პროცესს, აუმჯობესებს კუჭ-ნაწლავის ტრაქტის ყველა რგოლის ფუნქციას, ამაღლებს იმუნიტეტს;
კარგ შედეგს იძლევა ქრონიკული სურდოსა და ბრონქიტის მკურნალობისას. ხელს უწყობს ფილტვის ალვეოლებში ლორწოს გათხევადებას და ბუნებრივი გზით მის გამოყოფას ნაწლავების მეშვეობით;
თაფლიანი წყალი ნაწლავის ერთგვარ სანაციას ახდენს, ფეკალური მასები იხსნება და გამოიდევნება;
იწმინდება მთელი ორგანიზმი უჯრედულ დონეზე. ნორმალიზდება მსხვილი ნაწლავის ფუნქცია. იზრდება როგორც ანტიბაქტერიული, ასევე ანტივირუსული და ანტიმიკოზური (სოკოს საწინააღმდეგო) ეფექტი;
თაფლიანი წყალი ნაწლავის მიკროფლორის აღსადგენად საუკეთესო საშუალებაა, ეფექტურად ებრძვის დისბაქტერიოზს;
მისი გავლენით ქრება ენურეზი (შარდის შეუკავებლობა). თაფლი ჰიგროსკოპიულია, იკრებს წყალს, ამიტომაც თირკმელები და შარდის ბუშტი ღამღამობით განიტვირთება და ისვენებს.
თაფლიანი წყლით კარგია სახის გაწმენდა. ის კვებავს კანს, სირბილეს, სინაზესა და ხავერდოვნებას ანიჭებს მას. ეს არის ნატურალური კოსმეტიკა, უძველესი და იმავდროულად თანამედროვეც.
ერთი სიტყვით, ეს ფუტკრისგან ნაბოძები ნუგბარი ბავშვებისთვის, მოზრდილთათვის, ხანდაზმულებისთვის- ყველასთვის სასარგებლოა.
უფროს ადამიანს ექიმი ურჩევს მიიღოს დღეში 60-დან 100 გრამამდე თაფლი (უმჯობესია რამოდენიმე მიღებაზე), ბავშვებში ეს დოზა ორჯერ მცირდება.
თაფლი სიფრთხილით გამოიყენება ნივთიერებათა ცვლის დარღვევის, განსაკუთრებით ნახშირწყლების ცვლის მოშლისა და დიაბეტის დროს. ამ შემთხვევაში უნდა აკონტროლოთ სისხლში შაქრის შემცველობა.